عشانك يامصر مفيش مستحيل

"مالك يابلدي"

حبيبتي يا بلدي مالك حزينة
ودمعك بيجري في عيون كحيلة

عشان قلة فيكي خانوا عهد ليكي
نهبوا شبابك وبكل حيلة


باعوا ضميرهم وماخلوش لغيرهم
ونسيوا يمين الشرف والفضيلة

استلذوا الرشاوي و عملولنا حاوي
وطفحت جيوبهم والعين بصيرة

قالوا البلد فقيرة مواردها قليلة
ربطنا الحزام و الايد قصيرة

سرقة وغنايم وملايين يا نايم
برة وجوة بإس السراية
وأنا أطير وأغني بألف جنيه يا نني
عيوني تدمع ويفرح ضناية


فاكرينها دايمة ليهم راح فين اللي قبليهم
القبر مستنيهم وهية النهاية

ح تقدر تقول وسجنك يطول
يضيع قوت عيالك و كمان عشاية
*******


تعالى لثورة ميدان التحرير
تكسر قيودك ونومك يطير

وتفرح لأول مرة في حياتك
صوتك له قيمة غني أو فقير
بلادي عفية بولادك قوية

أرضك قنالك و خيرك كثير
محمد و جرجس علية ومارية
راح يعيدوا مجدك وربك كبير

في كل أذان صلاة في الميدان
و ترانيم كنيسة ووحدة ضمير

وشهدا بدماهم تخلد خطاهم
ولقمة قسمها الكبير والصغير

الكل داب في حبك و راح يصون عرضك
واللي ح يغدر يبقى حقير

عشانك يا مصر مفيش مستحيل
و بكرة منور و ريحته عبير