احساسك ايه دلوقتى وانتى مش معايا

احساسك ايه

احساسك ايه وانتى ف حضنه ومش معاه..
احساس جميل زى اللى كان بينا وطفاه..
بتقول عينيه كلمة بحبك وتشوفيها..
زى اللى كانت من عينيا وتسمعيها..
بتحسى دقة قلبه لما تنادى اسمك..
زى اللى كان بيقولها قلبى جنب جسمك..
بتلاقى منه حنان بيحضن بيه مشاعرك..
وتحسى لمس ايديه بشوق بتدوب ف شعرك..
بيخاف عليكى وبتلاقيه دايما ف ضهرك..
كده زى خوفى زمان كبيره او ف صغرك..
بسمة شفايفك بيقابلها بحضن دافى..
انا كنت بيها اتمنى اشيلك فوق كتافى..
لو قلتى اه ممكن ف يوم يسمعها تانى..
انا كنت لو بسمعها يوم اكره زمانى..
الكلمه منك عنده امر يكون مجاب..
انا كنت البى لو ح اطير فوق السحاب..
بيحس بيكى عايزه ايه من بس نظره..
انا كنت بقرا اللى ف خيالك لسه فكره..
بيدوب ويفرح وانتى ماليه الدنياعنده..
وسيبتى قلبى وعمرى للزمن وعنده..
احساسك ايه دلوقتى يعنى وانتى جنبه..
بتحبى مين دلوقتى قلبى ولا قلبه..
احساسك ايه وانتى ف حضنه وبيعاندنى..
بتحسى بيه ولا انتى لسه جوه حضنى..
لو تنطقى حتقولى يلا تعالى خدنى..