قصيدة وحشتيني
صفحة 1 من اصل 1 • شاطر
وحشتيني
ولو كل اللي عارفينك قالولك اني مانفعكيش
ولو كل اللي عارفيني قالولي بكره تنسيني
وحشتيني
ولو كل البشر قالوا ان انا عاصي
واني غلطت ف حياتي غلط ياما
ده واد تلفان وكل يومين معاه واحدة
وحتى فلان زعل وياه عشان واحدة
انا أصلا مانيش يوسف
ولو زوجة العزيز همت
وقالت هيت لك ياجميل
يجوز راح اميل
وممكن اضمها جهراً
يسيل من ضحكها نهراً
تدوب الاغنيات ف النيل
لكن مهما هاشوف وهاطوف ومهما قابلت ناس وظروف
هتبقي لوحدك القشة اللي جيت علشان تنجيني
وحشتيني
مافيش انسان مالوش ماضي
مافيش راجل مالوش أخطاء
لكن دايماً ف نقطة ضعف
ونقطة ضعفي هي انتي
وطول الوقت كنت باقول
انا مابقتش عاوز شيء سواكي انتي
باحس معاكي اني مسيح
براءتك عاملة زي الريح
بتكنس ف الغلط بهدوء
وبابقي ف ضحكتك سكران
ومش عارف لا انام ولا افوق
وكان فيه حل والله
وكان ممكن اكون بالوقت زوج صالح
ماليش ف المسئولية ساعات
ساعات طايش
لكن بالوقت كان ممكن اكون احسن
تسامحيني ف غلط فالت
وهاحلفلك بإني هاصلح العدلة التي مالت
بلاش تمثيل عشان أصلاً
صياعتي وفشلي من غيرهم
ماكانش يجوز تحبيني
وحشتيني
ف كل مكان ف ذكرى معاكي متسابة
ايديا ف ايدك الطفلة باعدي معاك ف الشارع
ملامحك وانتي بتسمعي فيروز
نهارك وانتي بتواجهيه بشاي بحليب
وحكاياتك على صحابك
فلانة بتكرهك جداً
فلانة قالتلي ماتشوفيهوش
كلام قولتيه وكان لازم
ف وقت الجرح ماتقوليهوش
اكيد دلوقتي بتقولي
زمانه مولع الدنيا
بيغلط كل يوم عادي
خلاص فاكك بقا ومرتاح
وانا والله ف قيودك
كطير من كتر ما اتقيد
طلعله جناح
انا ف البعد متحاوط بطيف ريحتك
ولسه لحد هذا الوقت فاكر شكل تسريحتك
وتنهيدك
وشكل الساعة علي ايدك
طريقتك وانت بتغني
بعيد عنك حياتي عذاب
حياتك ايه بعيد عني
يا دنيا عرفتها فجأة
وارض لمستها بشويش
يا أطهر من رقم فلكي
ف عداد اسمه أكل العيش
بتحكمي ليه على غيابي
وف حضوري بتنسيني
رفضتي ان انتي تتسابي
وفجأة انتي اللي سيبتيني
وحشتيني
كأنك ف الغياب أقرب
وجودك بيزيد إذا بعدتي
رصيد ناقص ف كل غياب ، ووحدك ف الغياب زدتي
عرفتي ازاي
عرفتي ازاي تشاركيني غنا التفاصيل
بقيت متساب لكن شبطان
شيطان طيفك ملاك ف شيطان
مخليني ف وسط الناس لكن وحدي
أشوف العمر بيعدي ،
وحسديني البشر ع ايه وانا بدونك ؟
وايه الدنيا سوى عيونك ؟
سوا حضنك ف وقت الخوف
يا عم الحاسد الطامع
تعالي وشوف طلل راجل ف عز الليل بيسرد قصته لروحه
ويشكي جروحه ل جروحه ،
ويظهر للبشر باسم ،
يعيش وكأنه مطمن
وهو في قلبه يتم عجيب
شوفيلك حل ف غيابك
يا إما رجوع من المبدأ
يا إما تقولي كيف أبدأ ف اي طريق ينسيني ؟؟
وحشتيني
غيابك طال
وبوّختي في هزار بعدك
انا بعدك عرفت اني ماليش بعدك
كبر سني
يا أول حاجه احوِّشها واشوفها بتتسرق مني
ابص من الغياب ع الباب واقول بالوقت هتحني
قعدت استني واتحوّلت
لشطره ف غنوة الأطلال
- غيابك طال -
خصامنا مهما كان حاصل
ماكنش ف بالي يقلب جد
ومتطوّح لا عارف اغيب
ولا بشكي اللي فيا لحد
بقيت زاهد ومش مشغول
ولا برحيل ولا بوصول
وباسكت وامّا قلبي يقول
يقول فينك !
ياريت كل اللي عارفينك .. قالولك اني بيكي بعيش
ياريت كل اللي عارفينني .. سابوني ف شكي ويقيني
وحشتيني
رماني الشوق عليكي من يومين فايتين
فتحت رسايلك السابقة من الآخر
فضلت اقراها واطلع فوق
اطلع فوق
وكل ما تنتهي دمعه تسيل أخرى
وكل ما تنتهي جملة يهِفّ الشوق
- ما فيش داعي لكلام تاني ... لقيت منك مكالمة الصبح ! في حاجة ؟
- يا ريت لو شفتي رناتي تردي حتى برسالة
- مالوش لازمة الكلام ده خلاص .. دي آخر مرة أقولهالك ما تتكلمش
- خلاص مش طايقة مني كلام . !
نقطة .. علامة إستفهام .. نقط أكتر .. تعجب .. نقطة .. واستفهام
- انا عاوزك يا ريت تتصلي من فضلك
فضلت أقرا .. فضلت أرجع .. شهور وايام .. شهور وايام
كلام متقال كأنه النار في كومة قش
رصاص طالع من الشاشة لقلبي الهش
رجعت أكتر .. فضلت أرجع
وفجأة لقيت كلام أجمل .. سلام أجمل
ورود ووعود .. كلام في الحب وسنينه
جُمل من أغنيات الست
فضلت اقرا .. وكل ما أقلب التفاصيل .. تزيد سنوات على سنيني
رسالة توّدي لرسالة
أهو رجعتي تحبيني
فضلت ارجع
كذا فلاش باك
وكل ما اراجع الأيام
تروّح دمعتي لعيني
فضلت أرجع .. لحد ما رحت للآخر
وفي الآخر
لقيت أول وحشتيني
بحطة ايدك الناعمة أنا ما زلت
و وزني زي ما هو لكنّي تقلت
وبمشي لحد ما بنسى بإني وصلت
طباعي ثابته ما اختلفتش
برَّبي كلاب .. بسيب واتساب
دوا المعدة تلات مرات
بفوِّت مرتين منهم
وكالعادة فيه كام موضوع
بيرفض عقلي يحسمهم
ورقمي زي ما هو
وبرايا نقيض جوه
وبفتكرك اذا بصيت بالليل من الشباك
واقول هتفوت
ياخدني بعدها سرحان .. يرد سكوت
حبيبك كل يوم بيموت
لكن واقف على رجليه
وضِحكُه مع الصحاب طالع
لكن برضه في شيء في عينيه
لا بد الشيء ده يبقى سؤال
رفضتي عليه تجاوبيني
وحشتيني عشر مرات وانا بكتب وحشتيني
ولو كان الزمن بقى غير
ولو حتى الظروف صادّه
وحشتيني ف رجوع الطير
لعش اتهد من مدة
بقيتي نشيدي وحكايتي .. وصمتي وصوتي ومرايتي
بقيتي نهايتي وبدايتي .. ومعجزتي اللي جيت بيها
جدع زيي مخبّي الدنيا في جيوبه
لكن اشواقه ليكي تبان
ومش عارف يخبيها
لا عشت معاها يا قلبي
ولا لك نبض بعديها
بشوف نفسي في ظهر الباب
براجع كل لوم وعتاب
ومستني الزمن يصفى
وبرد الأمنيات يدفى
وتصفالي الظروف مرة
وتنسي الدنيا وتجيني
ولو عايروني بغرامي
وقالوا عليا عايش وهم
هاكون الإيد اذا كيوبيد
بيطلِق في اتجاهك سهم
ولو قالوا ياعيني حرام
عشقها الواد وتاه فيها
هتبقي غصب عن عينهم
حياتي وأغلى معانيها
ولو قالوا دي ساحراله
وعملاله عمل بالشوق
ولو قالوا انا انا اتجنيت
بقسوة او بصنعة وذوق
ف لو ده سحر انا قابل
ولو ده جنان انا قابل
ولو حُبِك اثر خمرة
ما احبش افوق
واه انتي نقط ضعفي
واه حابك على عيوبك
واه ضلك
واه قلبي اللي فاضل لك
واه دايماً باطبل لك
واه بإشارة محسوبك
كلامهم عندي مش فارق
ومش هافقد امل ف رجوع
مافيش مواضيع اقولهالك
غير انك وحدك الموضوع
وان حياتي ناقصاكي
وقلبي سابني ومعاكي
وان عنيا شايفاكي
ف اول كرسي ف يميني
بتدي ضحكة للدرويش
عشان يلقي وحشتيني
ولو كل اللي عارفينك قالولك اني مانفعكيش
ولو كل اللي عارفينني قالولي بكره تنسيني
بقلم : عمرو حسن
مواضيع مماثلة
للمشاركة انت بحاجه الى تسجيل الدخول او التسجيل
يجب ان تعرف نفسك بتسجيل الدخول او بالاشتراك معنا للمشاركة
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى