رساله شهيد يبكي علي حال مصر
يامصريابلدي لفين هتروحي
ده انا فيكى بداوى كل جروحى
بقيت وانا ماشى بتطلع روحى
على إيد اخويا من دمى وروحى
******
بنزل وارجع ..لأمى شهيد
وأمى بتبكى ..وبإيه هيفيد
كان كل دقيقة بييجى وليد
دلوقتى فى لحظة بيبقى شهيد
******
قتلوا فينا روح الحريه
وحطوا مكانها أيآدى خفية
بتدمر فيكى وف غيرى وفيّا
وبتفضل هى زى ما هيه
******
بقى كل بيت فيكى حزين
وكل دمعه .. وراها أنين
لا قدرنا نفرح .. ولا عارفين
طريق الفرحة نروحله منين
******
نزلت أهتف فى التحرير
وقولت .. أطالب بالتغيير
لقيت نفسى فى وطنى أسير
لعصابة .. غرضها التدمير
روحت .. وراحوا زيى كتير
******
يا مصر فيكى الظلم زاد
وجهل انتشر ..وسابقه فساد
وكل ده .... سببه العناد
من ناس مبتخافش رب العباد
******
ممكن يا حسنى أسألك سؤلات
؟؟؟
فاكر .... لما حفيدك مات ؟
فاكر الألم والحزن والآهات؟
هو ده دلوقتى حال الأمهات
******
بس الفرق هنا ..... كبير
حفيدك واحد.. وشبابنا كتير
حسابك عند ربك ... عسير
أصل انت إفتريت وربى قدير
******
كل ظالم .... وله نهايه
واللى إنت فاكره ده بدايه
ممكن يكون بداية النهايه
والدنيا دى اكبر مرايه
******
هتبص فيها تلاقى نفسك
اللى قتلته فى يوم ده قتلك
بس هيكون ده تدبير ربك
هو اللى هيخلص بطارنا منك
إسمع كلامى .. وخليه فى سرك
******
ده كاس وداير على الناس
واللى النهارده بجبروته داس
بكرة بالجزم ...... هينداس
وهيبقى ده .. أعدل قصاص
******
"اللهم اني استودعتك مصر وأهلها، أمنها وأمانها، ليلها ونهارها، أرضها وسماء ها، نيلها ومنشآتها،
فأحفظها ربي يا من لا تضيع عنده الودائع فانت خير حافظا وانت ارحم الراحمين"
والسلام عليكم ورحمة الله وبركاته