أولا كل سنة و كلكم طيبين و بألف خير بمناسبة السنه الجديده 2011
النهاردة عاوز ادردش معاكم فى موضوع معتقدش ان فيه اهم منه حاليا بالنسبة لناس كتير قوى سواء شباب او كبار فى السن و الموضوع موجه للبنات و الولاد بدون استثناء .
معلش بقى الموضوع طويل و ربنا معاكم .
هنتكلم عن صاحب او صاحبة القلب المجروح من اقرب الناس .
بعيدا عن كلام الرومانسية او اليأس او الكلام اللى يفتح الجروح تانى . هنتكلم بواقعية و باسلوب عملى جدا بحيث نوصل للى محتاجين نوصله بسهولة .
دايما بننجرح من اقرب الناس لينا سواء اصدقاء او احباب مع اختلاف الأسباب طبعا و هنا فى الموضوع دة انا اقصد جرح الحبيب تحديدا .......!!!!!!
انجرحت ......طب تعالى كدة اقولك حاجة .
أولا : قربك من ربنا علاج لكل شى مهما كان هو ايه ...و دة شى مسلم بيه مش محتاج نقاش
ثانيا : اقف فى الشارع و بص على الناس كلهم اطفال و شباب و بنات و ولاد و كبار و كل الناس اللى حوليك حتى سواقين التاكسى .......ياترى لاحظت حاجة ..........
فى حد وقف او بطل اللى كان بيعمله لما انت انجرحت ....الدنيا وقفت يعنى .....بالتأكيد لا ...الدنيا ماشية مش بتستنى و لا هتستنى حد مهما كان ......و لا حد هييجى يطبطب عليك و انت مجروح ....عارف ليه ......
بمنتهى البساطة لان الدنيا فيها الشئ و نقيضة ...وزى ما فيها الداء فيها الدواء و زى ما فيها الحب فيها بردة الخيانة ......و زى ما فيها الفرح و السعادة فيها بردة الهم و الحزن ...و الأمور دى كلها اصبحت اشياء مسلم بيها تماما و ناس كتيرة قوى تقبلت المواضيع دى و بدأت تتعايش معاها . يبقى أول حاجة تفكر فيها : انك تتقبل اللى حصل دون التفكير فى اسبابه .
متفكرش فى اللى حصل دة حصل ليه و ياترى كان ممكن اعمل ايه اتجنب بيه الجرح دة ...و لا تسأل نفسك انت غلطت فى ايه و لا ليه .....اوعى تدى فرصة لدماغك انها تتوه منك فى اسئله مالهاش اى فايدة ..
ثالثا : ياربى ...انجرحت و مش عارف اعمل ايه دماغى مشوشة و مش قادر افكر و مش قادر انسى و كل لحظة صورتها قدامى و بفكر فيها و مش قادر اعمل حاجة فى حياتى و .....و ......!!!
زى ما قلنا قبل كدة بمجرد تقبلك للوضع دة جزء كبير قوى من حل المشكلة . لكن الأكيد لسه فيه حاجات تانية . بطل كلمة " مش " دى ...مش قادر ازاكر ....مش قادر افكر فى حد غيرها ....مش قادر انساها ...
الكلمة دى مش اكتر من كلمة بتعجز بيها نفسك و بتقتل فيك قدرتك على انك تبقى انسان مستقل تماما قادر انه يعيش باللى حوليه و كمان من غيرهم ....
و لازم تعرف انه دايما فى حاجة اسمها خطوة لقدام عشان توصل لشى انت بتحبه ..و الخطوة دى ممكن تكون فى الحب و ممكن تكون فى الدراسة و ممكن تكون فى المستقبل بصفة عامة ..مش مرتبطة بحاجة بعينها يعنى ... لكن المهم دلوقتى ان فيه خطوة لقدام لازم تاخدها ..!!
رابعا : بمنتهى البساطة حبيبك جرحك ...يبقى عمره م كان حبيبك ....تصدق بقى ...ايوة ..انت اللى غلطت من الأول ...سوء اختيار يعنى ....بالرغم من كم الكلام الجميل و المكالمات و المقابلات وبحبك و وحشتينى و .....و ...... ايوة بقولك بردة دة كان اساءة اختيار ...
عرفت تحب بس معرفتش تخلى حبك فى المكان الصح ...!!
فى معايير مهمة قوى فى كل علاقة عشان نقدر نقول عليها علاقة حب متكاملة .
طبيعى قوى ان محدش كامل لان الكمال لله وحده ... لكن لازم تفهم :
- ان التضحية مطلوبة من الطرفين ...مش واحد يضحى و التانى بيتفرج .يعنى لو ضحيت و حبيبك اتفرج عليك يبقى اعرف انك مش تلزمه .!!!!لو بيحبك هيضحى عشانك .!
- احترام المشاعر و تقديرها امر واجب على الطرفين تماما و الاهم من كدة حسن النية . لازم كل واحد يحترم مشاعر التانى سواء فى الشوق او فى المحبة او فى الهزار او فى الغيره ..
- الانفعال المتزن بين الاتنين لازم منه ..يعنى وقت العصبية او خناقة بين اتنين كل واحد على قد م يقدر لازم يبقى عارف بيقول ايه .. مش يجرح و يقول كنت متعصب .. صدقونى لو اتنين وصلوا لمرحلة الانفعال المتزن دى بنسبة 99 % مش بتواجههم اى مشاكل تانى من غير م يتفاهموا فيها بصورة صحيحة . تقدروا تقولو كدة ابن البلد بيضرب و قلبه على اللى قدامه ..
- اوعى حبك يخليك متشوفش عيوب حبيبك ..سيبك من ان مرايه الحب عميه و لا حتى حوله ...كل واحد لازم يصلح عيوبة عشان نفسه اولا و عشان خاطر حبيبه ثانيا ....
- الأنانية : دائما سبب فى معظم المشاكل .... بلاش يا جماعة الأنانية فى العلاقة اوقات بنلاقى بنت او ولد بيجمع بين الحب و بين طموحات انانية بتقتل الحب ...مبقولش بلاش طموحات ..... لا طبعا لازم ... بس لازم تحلم باللى يناسبك و باللى تقدر تتعايش معاه و ميجرحش الحبيب ...
- يا جماعة الحب راحة للقلب و النفس معرفش ليه عندنا احنا سبب اليأس و الهم و التفكير و ...و..... فرق كبير قوى بين الحب الحقيقى و الحب اللى معظمنا عايشه دلوقتى ...
ملخص :
1- تقبل الوضع كما هو دون اى تفكير .. 2- غير روتين حياتك ..اعرف ناس جديدة ..كون صداقات ...اعمل الحاجة اللى بتحبها ... 3- اتخلص من كل حاجة ممكن تفكرك باللى جرحك مهما كانت بسيطة قد ايه .. معاك صورة ليه ..احرقها ....معاك دبلة منه .....ارميها فى البحر .....عندك هدايا ...ارميها فى الزبالة ..... و افتكر و انت بتعمل كل دة ان اللى جرحك هو اللى اختار النهاية بايده مش انت . 4- اوعى ترخص من نفسك و من مشاعرك مهما كانت خصوصا لو اديتها لحد معرفش يصونها ..ولازم تعرف انك هتلاقى احسن منه يقدرها و يصونها و يشيلها فوق راسه . 5 - اوعى تسمح لعينك تدمع على قلب مش هقول خاين لا قلب بايع ...اشتريته بالغالى و باعك بالرخيص .... 6 - لازم تعرف انك هتعيش حياة سعيدة مستقبلا ان شاء الله ..و اللى جرحك هييجى عليه اليوم اللى يندم فيه على اللى عمله ...مهما طال الوقت بس صدقونى اكيد هيندم ندم عمره . 7 - اللى بيحبك عمره م هيجرحك و مفيش حاجة اسمها كان غصب عنه ...متحاولش تدور على اعذار هى اصلا مش موجودة الا فى خيالك ....! 8 - بعد عنك مرة و عاوز يرجعلك تانى ....صدقنى مهما كان ندمان ... اللى عرف يبيع مرة واحدة يقدر يبيع مرة و اتنين كمان ... 9 - اللى ما يقدرش ما يستاهلش . 10- اوعى تخاف من الفراق ....اوقات كتيرة بيبقى خير و بداية لحياة جديدة اجمل و احلى الف مرة من الماضى .
11- اللى جرحك لو احتاجك فى ظروف صعبة اوعى تتخلى عنه ...مش عشان بتحبه ..لأ ..لأنك بتعمل بأصلك .. و بتعرفه انه كان مجرد مرحلة اخدت وقتها و عدت ...و وقوفك جمبه بتعرفه هو قد ايه كان قليل الأصل لما جرحك .
12- متحكيش مع حد فى حاجة ..عارف ان الفضفضة حلوة و بنريح اوقات بس مش دايما و متنساش انك كدة بتصحى مشاعر سلبيه جواك ...دة غير ان اللى بتحكى معاه هينصحك من وجهه نظره اللى ممكن تكون صح و ممكن تكون غلط ....!!!
13 - قوى نفسك بنفسك ... و خلى كلامك و تصرفاتك كلها ايجابية .. فكر فى بكره و تخيله احلى من امبارح لان بكرة دايما احلى و بعد بكره بردة احلى ...اكبر بنفسك و بتفكيرك و بحياتك ...بتشتغل ....حاول تبقى حاجة مرموقه الناس كلها تتمناها ....الناس كلها تتمنى تتعرف عليك ..الناس كلها تتمنى انك تبقى جزء من حياتهم ...
14 - اعمل اللى يخلى اللى جرحك دة فى يوم لما يشوفك او يسمع عنك يعرف قد ايه هو كان صغير قوى .....!!!
مشاعرك و حبك اكبر الف مرة من انك تسمح لحد انه يجرحها مهما كنت متعلق بيه و مش هقولك هتنسى لان مفيش حاجة بتتنسى بس لازم تتأكد انك فى يوم هتعدى من جمب اللى جرحك دة و لا كأنك تعرفه ..و ممكن تتكلم معاه كمان و بردة و لا كأنك شفته قبل كدة ..
خلاص لان قلبك و عقلك رفضوا وجوده فى حياتك ....رفضوا وجود اى حد يرخصهم فى حياتك ..و بمنتهى البراءة هيتقبلوا اى حد تانى يقدر المشاعر دى و يصونها
كلمات علمتنى الكثير :
- دايما فى امل.... - I Believe I Can Fly Away And I Will Do It What Ever It Takes From Me - الانسان الطبيعى هو الانسان الذى يرى الفشل جزء طبيعى جدا من طريق الوصول الى النجاح - حاول دايما تعمل حاجة تخلى الناس تفتكرك بيها . - اوقات بنضطر ندمر كل حاجة عشان نحمى حاجة واحدة بس ... - البداية الجديدة افضل دائما من اصلاح الماضى - كلما أدبني الدهر... زادني علما بجهلي .... واذا ما ازددت علما ... ازددت علما بجهلي!!!
سؤال :
اذا كنت على حافة الهاويه و لا مفر من السقوط فهل تغمض عينيك و تصرخ ..ام تفتح عينيك و تواجه مصيرك بكل شجاعة ....؟
